Sorry, you need to enable JavaScript to visit this website.
Skip to main content

5 حركات بسيطة هتخليك تبطل تقول "آه يا ركبي!"

ركب

مشاكل الركب من أكتر المشاكل المنتشرة عند ناس كتير. إحنا كتير ومن غير مابنحس بنحمِّل على ركبنا. مش بس كدة، إحنا كمان بنقعد وبننام في أوضاع بتتعِب ركبنا أكتر ما بتريحها. وفي الآخر بنرجع نقول "آه يا ركبي!"

 

دي خمس تمارين سهلة وبسيطة هتخليك تستغني عن الجملة دي للأبد. إعملها صح وبإنتظام وركبك هتشكرك.

 

تمرين 1

 

هتحتاج كرة وحيطة عشان التمرين ده. هتبدأ بإنك تاخد وضع مشابه لوضع الجلوس وركبك هتكون مثنية بزاوية 90 درجة. هتسند الكرة في منتصف ضهرك وتسند على الحيطة (بحيث الكرة تكون بين ضهرك والحيطة). وهتنزل وتطلع مستعمل الكرة اللي ضهرك مسنود عليها عشان تساعدك في الحركة دي.

 

 

تمرين 2

 

ده تمرين إطالة (stretching) هيساعد في تخفيف الم الركب. كل اللي محتاج تعمله انك تقف وضهرك مفرود وتثني ركبة واحدة لورا وتمسك قدمك ورا ضهرك. مش لازم تفضل في الوضع ده فترة طويلة. لمدة 10 ثواني هيكون كفاية.

 

تمرين 3

 

هتحتاج مرتبة تمرين. نام على جنبك وخلي ذراعك تحت راسك عشان تسندها وإثني ركبك ثنية خفيفة. وإبدأ برفع رجلك مع إبقاء ركبتك مثنية ورجعها تاني. كرر التمرين ده كذا مرة على الناحيتين.

 

تمرين 4

 

التمرين ده سهل جداً وممكن تعمله في اي مكان حتى لو على المكتب. وانت في وضع الجلوس على كرسي خلي ضهرك مفرود وإرفع رجل واحدة لحد ما تبقى ركبتك تقريباً مفرودة وبعدين رجعها وكرر التمرين على الناحيتين.

 

تمرين 5

 

في التمرين ده هتحتاج حاجة تستعملها كدرجة. ممكن تستعمل درجة سلم او صندوق قوي او ال Step اللي بيستعمل في الجيم. كل اللي هتعمله انك هتحط قدمك على الدرجة دي وترفع نفسك كأنك بتطلع السلم بس ماتطلعش فوق الدرجة برجلك التانية، بعد ماترفع نفسك إنزل تاني على الأرض. كرر التمرين ده على الناحيتين.

 

إلعبها صح... أهم حاجة وانت بتعمل التمارين دي انك تخلي بالك إنك ماترهقش ركبك وتحمل عليها. التمارين دي المفروض تقوي العضلات اللي حوالين ركبتك عشان تدعمها وبالتالي ماتحسش بألم فيها بعد كدة. ركز اثناء التمارين ان ضهرك يكون مفرود وإنك ماتكونش بتستعمل ركبتك غلط علشان تعرف تستفيد منها كويس.

bassem

Thu, 03/14/2019 - 10:16

test
محتويات هذا الحقل سرية ولن تظهر للآخرين.
  • الرسائل الإخبارية
  • اتصل بنا