Sorry, you need to enable JavaScript to visit this website.
Skip to main content

خد القرار، من النهاردة مفيش أعذار

Stop making excuses

أكتر وقت بتحلى فيه الأعذار هو الوقت اللي بتقرر تعمل فيه حاجة لصحتك. "يااااه أنا مشغول جدا" أو "أنا مضغوط"، أو "خلاص بقى حبتدي من بكرة". افتكر كدة كام مرة فكرت تشترك في جيم و قلت لنفسك "حروح من بكرة" و خلصت السنة و بكرة بردو لسة ماجاش؟ متقلقش، احنا لقينا لك حلول لأكتر 5 أعذار بتبرر لنفسك انك تأجل الالتزام بالرياضة:

  1. "معنديش وقت"

صعب جدا انك تحاول تمارس الرياضة بشكل مستمر لو أقنعت نفسك انك لازم تخصص ساعتين كاملين من يومك ليها. حاول تبقى خبيث و اقنع نفسك بتغييرات بسيطة انك كدة بتتحرك أكتر و بتلعب رياضة. استخدم السلم عشان تطلع و تنزل بدل الأسانسير، اتمشى للسوبرماركت بدل ماتروح بالعربية، أو شغل أغنية بتحبها و ارقص عليها بطريقة مضحكة عشان تبقى بتحرك جسمك و في نفس الوقت بتقلل الضغط من عليك.

 

  1. "أصل جسمي مابيحرقش"

جسمك مبيحرقش عشان مبتتحركش كتير و بتاكل أكل مش صحي بس لو أكلت صح  و مارست الرياضة بشكل مستمر، جسمك حيحرق الدهون. لو بتاكل أكل صحي و بتلعب رياضة و بردو مبتحرقش بيقى لازم تروح لدكتور و متقلقش الحل بيبقى بسيط.

 

  1. "أنا مش عايز أبقى بطل كمال أجسام."

أول ما تدخل أي جيم، بتلاقي مدربين و ناس أقل حاجة تتقال عليهم أنهم أبطال كمال أجسام و انت هدفك انك تخس و تبني شوية عضلات على الخفيف. متقلقش، الناس دي بتشتغل 24 ساعة عشان توصل للشكل دة و بيبقى شغلهم بس شوية تمرينات كارديو و لا الكام كيلو اللي بتشيلهم مش حيخلوك تبقى بطل كمال أجسام.

 

  1. "أنا مش محتاج ألعب رياضة، أنا باكل قليل."

لو انت عايز تخس أو عايز تحرق الدهون اللي في جسمك و معتمد على الأكل بس فده معناه انك ماشي على ريجيم صارم و بتحرم جسمك من العناصر الغذائية اللي بيحتاجها. تعرف بقى انك كدة بتقلل معدل الحرق في جسمك و بتقلل العضلات اللي فيه؟ و بعدين ليه تخس براحة لما ممكن الرياضة تزودلك معدال نزولك في الوزن بشكل صحي؟

 

  1. "أنا بزهق بسرعة"

لو بتزهق بسرعة، الحل مش انك تلغي الرياضة من حياتك خالص...الحل انك تغير الروتين. مش كل مرة تروح الجيم تجري على المشاية و تشيل حديد، ممكن تتروح زومبا أو تلعب تنس أو سباحة عشان ماتزهقش.

 

سهل جدا انك تستسلم للأعذار و تكسل تلعب رياضة، بس السؤال هنا: صحتك ماتستهلش المحاولة؟ جرب الحياة الصحية لمدة 3 أسابيع و صدقنا أول ماتشوف بعينك النتايج، مش حتقدر تستسلم للأعذار تاني!

 

 

 

محتويات هذا الحقل سرية ولن تظهر للآخرين.
  • الرسائل الإخبارية
  • اتصل بنا