Sorry, you need to enable JavaScript to visit this website.
Skip to main content

6 نصايح عشان تغلب وحش الدليفري اللي جواك

Fast Food

"أنا حاكل ايه النهاردة؟ بيتزا؟ مكرونة؟ سندويتشات؟" مأسااااه! الحيرة اليومية و انت في الشغل و مش عارف تاكل ايه و بطنك لسة بتحاول تتعافى من الأكل الأي كلام اللي بتاكله كل يوم و ممكن ترفع عليك قضية لو حاولت تاكل حاجة مش صحية تاني. سواء كنت مضطر انك تطلب أكل من برة أو انت بتحب أكل برة، لازم تخلي بالك من النصايح دى و انت بتطلب عشان صحتك في الأخر أهم:

  1. متنساش اللون الأخضر

لازم الخضار يبقى جزء أساسي من كل وجباتك سواء في الطبق الرئيسي أو في الأطباق الجانبية. ساعات العمل الطويلة بتخلي جسمك محتاج لعناصر غذائية مش ممكن تاخدها من أي مصدر تاني غير الخضار. خدها كا قاعدة عامة انك تخلى نص وجبتك خضار.

 

  1. قليل بس فيه البركة

عادة بننسى ناكل لحد ما نبقى خلاص واقعين من الجوع و بنفتكر انا حنقدر نقضي على الأخضر و اليابس فلما نيجي نطلب، بنطلب أكل كتير و بتكون النتيجة اننا يا بنشبع من لقمتين أو بناكل زيادة عن احتياجنا و نندم بعدين. عشان كدة اطلب حجم وجبتك العادية أو حجم أصغر كمان حتى لو واقع من الجوع عشان تاخد العناصر اللي جسمك محتاجها من غير حشو على الفاضي. التحكم في الكميات من أهم قواعد التغذية الصحية.

 

  1. تفادى القنابل!

قنابل السعرات عادة بتبقى في السكريات و المقليات. طبعا انت بتحتاج سكريات بشكل يومي بس دة مش معناه ان مصادر السكر تبقى غير صحية عشان انت كدة بتضر جسمك أكتر من انك بتفيده. اطلب سلطة فواكه بدل ما تطلب كيك. حاول تبعد تماما عن المقليات مش بس سعراتهم الحرارية عالي، لأ كمان بيعرضوا صحتك للخطر.

 

  1. بعيد عن العين، بعيد عن البطن.

أول ما تحس انك شبعت، لف باقى الوجبة و حطها في مكان بعيد عن عينك عشان لو فضلت شايفها حتاكل اكتر من احتياجك.

 

  1. ساعد جسمك ينسى!

لو ناوي تطلب أكل من برة و حاطط عينك على أكلة تقيلة، ساعد جسمك يتخلص من السموم بانك نشرب مياه كتير  خلال اليوم عشان جسمك ينسى الجريمة اللي ارتكبتها في حقه.

 

  1. لما تزودها، اتحرك أكتر.

أحيانا مبتقدرش تمنع نفسك و بتطلب أكل من برة مضر جدا و مليان مقليات و دهون. ارمي اليوم دة ورا ضهرك و زود حركتك في الأيام اللي بعده و خفف أكلك على قد ماتقدر. حاول ماتزودهاش أكتر من مرة في الأسبوع عشان على المدى الطويل جسمك بيتعب من السموم اللي بتدخله كل شوية.

 

و دلوقتي بعد ما عرفت ازاي تتحكم في الأكل اللي بتطلبه دليفري، اعرف اواي تحافظ على جسمك لو اضطريت تاكل برة من هنا.

 

 

 

 

 

محتويات هذا الحقل سرية ولن تظهر للآخرين.
  • اتصل بنا