Sorry, you need to enable JavaScript to visit this website.
Skip to main content

اقفل الباب في وش جوع اخر الليل

Girl searching for food in fridge

عمرك غسلت سنانك و دخلت السرير و استعديت للنوم و فجأة هاجمتك صورة بورجر و بطاطس محمرة و لقيت نفسك بتطلب دليفري الساعة 12 بالليل؟ متقلقش انت مش لوحدك! المشكلة اننا بنواجه لحظة الحقيقة تاني يوم الصبح لما نوزن نفسنا و يغمى علينا من الرقم اللي نط فجأة في يوم و ليلة! ليه طيب بنجوع بالليل و ازاي نطرد الجوع لو دق على بابنا بالليل؟

 

 

ليه بنجوع بالليل؟

 

1.  عشان بتكمل عشاك نوم!

مثل عشاك نوم الهدف منه انك ماتاكلش أكل تقيل على العشا مش انك متكلش عشا صحي. العشا الصحي لازم يشبعك مش عشان بتاكل كتير بس عشان بتاكل وجبة متاكملة فيها بروتينات، فيتامينات، و عناصر غذائية تانية.

 

2.    قلة الأكل.

لازم تاكل 3 وجبات و يبفضل كمان وجبات خفيفة بين الوجبات الرئيسية مرتين في اليوم. الجوع بيهجم عليك بالليل لما بتنسى أو بتهمل وجبة من وجباتك خلال اليوم.

 

3.   الشرب الزيادة.

شرب المشروبات المسكرة أو الغاذية بالليل بتأثر في نسبة الانسولين في الدم و دة بيخليك تجوع جوع شديد بالليل.

 

ازاي نطرد جوع نص الليل؟

 

1.     اشرب و بعدين كل.

مخك ساعات بيتلخبط بين اشارات الجوع و العطش فا لو حسيت انك جعان بالليل اشرب مياه كتير عشان تملا بطنك.

 

2.   أمن نفسك.

ساعات شرب المياه مبيكونش كفايه عشان كدة لازم تأمن نفسك بانك تعمل سناك صحي و تخلية جاهز في التلاجة تحسبا لأي هجمات جوع ممكن تجيلك بالليل. السناك دي ممكن تبقى سلطة خضرا أو فاكهة.

 

3.  زود طعم لسنانك.

حيلة بسيطة بس ممكن تساعدك تتغلب على الجوع: استخدم معجون ليه طعم زي النعناع مثلا عشات تقلل من شهيتك. و حاول تقنع نفسك انك لو ضعفت و أكلت حتضطر تغسل أسنانك تاني. الكسل في الحالة دي مفيد، أصل مين حيعوز يغسل سنانه مرتين كل ليلة؟

 

4.   روق.

اثبتت الدراسات ان الضغط العصبى و التوتر من أسباب هجمات الجوع الليلية. فبدل ما تلجأ للأكل عشان الدعم النفسي، روق بالك و لما تحب تاكل متاكلش غير عشان القيمة الغذائية اللي موجودة في الأكل. دعم الأكل النفسي مؤقت.

 

5.   غير من نفسك.

لو انت متعود على الأكل و انت بتتفرج على التليفزيون بالليل، حاول تغير من عادتك و اشغل نفسك بحاجات مفيدة زي القراية، الخياطة، لعب الرياضة. اتمشى بعد العشا و اسمع موسيقي عشان تروق بالك. الزهق من أهم أسباب تفكيرك في الأكل حتى لو انت مش جعان.

 

لو كل المحاولات دي فشلت، حاول تحصن نفسك بانك تنام بدري عشان النوم متأخر بيجوعك و بيأثر على صحتك. كمان متتعشاش بدري قوي و تنام متأخر، حاول تتعشا قبل النوم بساعتين عشان تتفادى هجمات الجوع بتاعة نص الليل.

 

 

 

محتويات هذا الحقل سرية ولن تظهر للآخرين.
  • الرسائل الإخبارية
  • اتصل بنا