Sorry, you need to enable JavaScript to visit this website.
Skip to main content

5 طرق صحية لطبخ الفراخ بطريقة غير تقليدية

رق صحية لطبخ الفراخ

الفراخ من الأكلات اللذيذة اللي ممكن تطبخها بطرق كتير مختلفة وصحية تخليك مش حاسس انك بتحرم نفسك من حاجة وفي نفس الوقت ماتحسسكش بالذنب. بس عشان نستفيد كويس من الفراخ لازم طريقة الطبخ ماتاخدش من الفوائد الصحية اللي فيها ولا تزود عليها دهون كتير تخليها مش كويسة عشاننا. دي طرق صحية لطبخ الفراخ بطريقة غير تقليدية.

 

بلاش سلق

الفرخة لما بتتسلق بتنزل كل الفايدة اللي فيها في الشوربة. فلو مش ناوي تشرب شوربة الفرخة، بلاش تسلقها عشان كدة هتبقى بتاكلها من غير الفايدة اللي فيها. كمان "نقع" الفرخة في المياه قبل الطبخ بيقلل من فايدتها. في طرق صحية كتير اوي لطبخ الفراخ غير السلق.

 

إستعمل الفرن بدل القلي

لو عايز فراخ مقرمشة زي البانيه مش لازم تقليها في الزيت وتخلي الفراخ مليانة دهون. ممكن تستبدل القلي بالفرن. حضر شرائح الفراخ بالبيض والبقسماط عادي. بس بدل ما تقليها، وزعها في صينية مدهونة طبقة خفيفة من الزيت ودخلها الفرن لحد ماتاخد لون ذهبي من برة وتستوي من جوة.

 

جرب سلطات بالفراخ

الفراخ لما بتستعمل في السلطة بتبقى طعمها حلو جداً وبتشبع وأهم حاجة انها بتكون صحية. جرب تعمل سلطة سيزار بالفراخ وقلل الصوص عشان تفضل صحية. في سلطات كتير جداً ممكن تعملها بالفراخ المشوية هتكون غداء مختلف وغير تقليدي وفي نفس الوقت صحي وبيشبع.

 

اشوي الفراخ

الشوي بيحافظ على فايدة الفراخ وكمان مش بيزود عليها دهون زي القلي. ممكن تشويها على الشواية او على البوتاجاز في طاسة او كمان جوة الفرن. في مكونات كتير ممكن تستعملها في شوي الفراخ هتخلي طعمها احلى زي الليمون، زيت الزيتون، الزبادي، الثوم، الأعشاب زي الروزماري والزعتر والريحان وممكن رشة جبنة بارميزان بس مش كتير!

 

قلل صوص، كتر خضار

الصوص من الحاجات اللي بتخلي طعم الفراخ يبان. بس الصوص الكتير مش صحي. مبدئياً، ممكن تعمل صوص بمكونات صحية زي الزبادي وعصير الليمون أو البرتقال أو البنجر. بس كمان اللي هيساعد انك يبقى عندك طبق جانبي يزود على طعم الفراخ زي الخضار المشوي. إشوي الخضار مع الفراخ والإتنين هياخدوا من طعم بعض لدرجة انك مش هتحتاج صوص كتير.

 

دايماً وانت بتطبخ فكر في اكتر طريقة صحية ممكن تتبعها وهتلاقي طريقة أكلك اتغيرت للأحسن والأصح من غير ماتضحي بالطعم!

محتويات هذا الحقل سرية ولن تظهر للآخرين.
  • اتصل بنا