Sorry, you need to enable JavaScript to visit this website.
Skip to main content

مرّن نفسك وانت على مكتبك وبلاش "وجع ضهر"!

مرّن نفسك وانت على مكتبك وبلاش "وجع ضهر"!

مين فينا ماقعدش على المكتب بالساعات لحد ما رقبته شدّت وضهره وجعه؟ القعدة لفترات طويلة خصوصاً قدام الكمبيوتر بترهق الجسم وبتشد العضلات خصوصاً في منطقة الضهر. عشان كدة لازم نتحرك على قد ما نقدر، وكل الدكاترة بينصحوا ان حتى اثناء الشغل لازم يكون في حركات تخليك تدّي عضلاتك فرصة انها ترتاح من قعدة المكتب. دي شوية تمارين خفيفة عشان الضهر ممكن تعملها وإنت في الشغل.

 

تمرين 1

وإنت قاعد على الكرسي إفرد ضهرك وبالراحة حط ايدك اليمنى على راسك وحرك راسك بإتجاه كتفك اليمين. إستنى شوية 10-20 ثانية ورجع راسك تاني وبعدين كرر الحركة دي على الناحية الشمال. ده تمرين إطالة stretch بسيط بيريح عضلات الرقبة.

 

تمرين 2

 

وإنت واقف حط إيدك الشمال على وسطك وإرفع إيدك اليمين فوق راسك وميل بالراحة ناحية الشمال. خلي ضهرك مفرود. إستنى شوية زي التمرين السابق وكرر التمرين على الناحية التانية. تمرين الإطالة ده هيريح ضهرك وكتافك بعد فترات الجلوس الطويلة.

 

تمرين 3

 

ممكن تبتدي التمرين ده على طول بعد التمرين السابق لأنه برضه هيريح منطقة الكتف وأعلى الضهر. حرك دراعك الشمال بإتجاه اليمين وثبته في الوضع ده بدراعك اليمين. استنى في الوضع ده زي التمرينات اللي فاتت وبعدين كرر التمرين على الناحية اليمين.

 

تمرين 4

 

التمرين ده هيريح منطقة منتصف وأسفل الضهر وكمان هتعمله وإنت قاعد في كرسيك. خلي ضهرك مفرود ولف بالجزء العلوي من الجذع (خلي كتافك مفرودة أثناء الحركة وإستعمل دراعاتك في إنك تثبت نفسك) وإستنى في الوضع ده زي التمرينات السابقة وبعدين كرر الحركة في الناحية التانية.

 

تمرين 5

 

بعد الجلوس لفترات طويلة كويس إنك تعمل حركات تنشط وتريح عضلات ضهرك في المجمل. الحركة دي هتساعدك في ده. وإنت واقف وضهرك مفرود هتميل ناحية اليمين وتمد دراعك اليمين لتحت وتثني كوعك الشمال. بعد ما هتستنى في الوضع ده شوية هترجع للوضع العادي وبعدين تكرر الحركة في الناحية التانية.

 

تمرين 6

 

التمرين ده بيعمل إطالة مريحة جداً للعضلات خصوصاً بعد يوم طويل ومتعب. هترفع دراعاتك فوق راسك وهتستعمل دراعك الأيمن انه يشد دراعك الأيسر وهتميّل بشكل بسيط ناحية اليمين. هتستنى شوية وتكرر الحركة في الناحية التانية. التمرين ده مريح جداً وبيدي العضلات فرصة انها تسترخي.

 

تمرين 7

 

التمرين ده بيشتغل على عضلات الرقبة. وإنت قاعد على المكتب هتفرد ضهرك ورقبتك وبعدين هتوطي راسك لقدام بحيث انك تعمل إطالة لعضلات الرقبة وهتستنى شوية في الوضع ده. بعدين هترجع راسك للوضع العادي.

 

 

ماتنساش ان الحركة مهمة. كويس انك تعمل التمارين دي مرة بس الأهم انك تواظب عليها وماتسيبش نفسك قاعد لفترات طويلة بدون حركة. فكر نفسك إنك تتحرك كل شوية عشان يفضل جسمك نشيط وتتجنب "وجع الضهر".

محتويات هذا الحقل سرية ولن تظهر للآخرين.
  • اتصل بنا