Sorry, you need to enable JavaScript to visit this website.
Skip to main content

طريق الألف ميل... إستعد بالشكل الصح لتمارين المشي!

ستعد بالشكل الصح لتمارين المشي

المشي من أحسن التمارين اللي ممكن تعملها. مش بس عشان المشي سهل ومالوش تكاليف زي الجيم مثلاً، بس كمان عشان المشي عادة صحية بتأثر بشكل إيجابي على جسمك، لما تمشي بشكل منتظم هتحرق سعر حرارية وهتنشط قلبك وجسمك!

 

المهم إنك لما تبدأ، تبدأ صح. وإحنا هنا هنكتبلك اهم حاجات لازم تجهزها عشان تبدأ تمرين مشي صحي.

 

الحاجات اللي هتحتاجها:

 

جزمة مشي

دي أهم حاجة في الموضوع. عشان تمشي صح لازم تكون مرتاح. الجزمة اللي هتنفع معاك بتعتمد عليك وعلى اللي انت محتاجه. الجزمة الصح هتديك دعم وبطانة ومرونة كافية انك تمشي براحتك. إسأل خبير عشان يساعدك تختار الجزمة المناسبة للمسافة اللي هتمشيها، السرعة اللي هتمشي بيها، طريقة مشيك وكل العوامل المحيطة.

 

بيدومتر (عداد الخطوات)

مافيش احساس احلى من انك تحط لنفسك هدف وحرفياً تمشي لحد ما توصل له. البيدومتر بيعد خطواتك وده هيساعدك انك تتقدم لحد ماتوصل للهدف بتاعك. لو انت لسة مبتدئ البيدومتر هيساعدك انك تشوف مستوى التقدم بتاعك لحد ماتوصل لهدف 10000 خطوة يومياً.

 

البس طبقات

مهم جداً اثناء التمرين – اي تمرين مش بس المشي – انك تلبس هدوم مناسبة تحميك من الحر والعرق. الطبقة اللي ملامسة لجلدك لازم تكون من أقمشة زي CoolMax  او البولي بروبلين عشان دول بيسحبوا الرطوبة اللي بتيجي من العرق بعيد عن الجسم عشان تتبخر. على عكس القطن اللي هيخلي العرق ملامس لجلدك.

 

إحمي راسك

البس حاجة على راسك زي كاب مثلاً عشان تحمي راسك من اشعة الشمس وتتجنب حروق الشمس. الكاب بالذات بيحمي الوش كمان. بس حتى وانت لابس كاب ماتنساش كريم الوقاية من اشعة الشمس.

 

إزازة مياه

ناس كتير بتسأل نشرب مياه قبل أو بعد التمرين؟ الإجابة انك المفروض تشرب كل ما تعطش. طول ما انت بتمشي خلي معاك إزازة مياه عشان تشرب وقت ماتعطش.

 

 

خلي المزيكا تساعدك

طبيعي ان الواحد لما بيسمع مزيكا بيستمتع بالحاجة اللي بيعملها أكتر. لو سمعت مزيكا وانت بتمشي هتخليك مش مركز مع المجهود الجسدي اللي بتعمله وبالتالي هتمشي لفترة اطول. في دراسة نشرت في 2002 من جامعة أوهايو لقوا فيها ان مرضى الصدر اللي بيسمعوا مزيكا وهم بيمشوا كانوا بيمشوا أكتر من اللي مش بيسمعوا مزيكا.

 

إمشي بإنتظام

حاول تخلي المشي روتين يومي، بإنك مثلاً تمشي في نفس المعاد كل يوم، او تمشي مع صديق لإن في ناس بتتشجع أكتر لما بيتمشوا مع حد تاني. ممكن كمان تعمل مذكرة يومية لتمرين المشي بتاعك.

 

انت كدة مستعد بالأدوات اللي هتحتاجها... ايه بقى طريقة المشي السليمة اللي هتخليك تمشي اسرع وتتفادي الإصابات؟

 

راسك: بص قدام.

دراعاتك: ماتشدهمش وسيبهم يتحركوا لقدام ولورا وانت ماشي. وماترفعش ايديك فوق عظمة الصدر.

الأرداف والوسط: إفرد ضهرك وخلي أردافك فوق قدميك بالضبط.

قدميك: حط كعبك على الأرض الأول وبعدين بقية قدمك.

رجليك: إمشي بخطوتك الطبيعية عشان تتجنب الألم.

محتويات هذا الحقل سرية ولن تظهر للآخرين.
  • الرسائل الإخبارية
  • اتصل بنا