Sorry, you need to enable JavaScript to visit this website.
Skip to main content

10 عادات صحية يومية هتغير حياتك

 عادات صحية

 

كلنا أوقات بنحس اننا مكسلين نعيش بطريقة صحية. البديل الغير صحي أوقات كتير بيبقى أسهل. بس في الحقيقة العادات الصحية أسهل مما تتخيل! دي 10 عادات صحية ممكن تعملها كل يوم من كتر ما هي سهلة.

 

بدل الأسانسير... خد السلّم

أول يوم أو يومين هتحس انك تعبان شوية بس بسرعة هتتعود. طلوع ونزول السلم تمرين بيشغل عضلات كتير في جسمك، ده غير انه كويس لتنشيط عضلة القلب. طلوع ونزول السلم هيبقى زي تمرين رياضي بسيط بتعمله كل يوم.

 

أستعمل التكنولوجيا لصالحك

في تطبيقات كتير ممكن تنزلها على موبايلك وتستعملها عشان صحتك. معظم التطبيقات دي بتساعدك على عد خطواتك وحساب المسافة اللي مشيتها كل يوم، كمان بتفكرك بنظامك الغذائي والمياه اللي المفروض تشربها كل يوم وبتعد السعر الحرارية وحاجات تانية كتير.

 

فطار أبطال

من أهم الحاجات اللي هتديك طاقة لبقية اليوم هو الفطار. جهز فطارك من الليلة اللي قبلها عشان ماتكسلش الصبح. ودايماً كل فطار صحي ولذيذ ومليان فيتامينات وسعر حرارية عشان تكمل بقية اليوم بنشاط.

 

تمارين البيت

مش لازم تنزل كل يوم تجري او تروح الجيم. اوقات كتير كل اللي بتكون محتاج تعمله انك تتمرن شوية في البيت. خد نص ساعة كل يوم والعب فيهم رياضة خفيفة في البيت وهتحس الفرق على طول.

 

كل أكتر

مش هتصدق ان دي نصيحة بس أوقات كتير بنبقى مش بناكل كفاية. بس لما تاكل لازم تاكل حاجات صح. اعمل لنفسك وجبات صغيرة وخدها الشغل. كل زبادي أو فاكهة بين الوجبات وخلي معاك غداك علشان متضطرش تجيب أكل من برة... دي حاجات ممكن تاكلها مابين الأكلات عشان تديك طاقة وغذاء.

 

نام كويس

النوم من أكتر الحاجات اللي بتأثر في صحتنا. النوم الكويس ليك بيبقى النوم المتوازن (من 6 الى 8 ساعات) ولازم يكون في فترة الليل. عود نفسك انك تنام بدري كفاية عشان تاخد 8 ساعات نوم وهتلاقي العادة دي فرقت معاك كتير.

عسل

العسل من أحسن مضادات البكتيريا. معلقة عسل كل يوم الصبح هتحميك اكتر مما تتخيل!

خد شوية شمس

يفضّل في وقت الشروق أو الغروب... الشمس في الوقت ده مفيدة جداً وبتساعد على تكوين فيتامين د في الجسم. بعيد عن الوقت من الساعة 11 الصبح لحد 3 العصر لأن اشعة الشمس في الوقت ده ضارة جداً. 

 

اشرب مياه أكتر

بشرتك وجهازك الهضمي هيشكروك على شرب المياه كتير. فكر نفسك كل شوية انك تشرب، وخلي معاك مياه كل ما تخرج.

 

إقرا عبوات الأكل قبل ماتشتريها

دي حاجة هتساعدك جداً على المدى الطويل. لو عايز تحافظ على صحتك لازم تاخد بالك من اللي انت بتاكله. إقرا العبوة قبل ماتشتري اي أكل عشان تعرف المكونات دي هتفيد جسمك ولا هتضره. العادة دي هتجنبك أكل كتير ماكنتش تتخيل انه مش مفيد ليك. 

محتويات هذا الحقل سرية ولن تظهر للآخرين.
  • اتصل بنا